Көн һайын эшемә ашҡынып барам, балалар менән аралашыуҙан сикһеҙ кинәнес кисерәм. Улар менән мин барлыҡ проблемаларымды онотам, арығанымды ла һиҙмәйем, тап кескәйҙәр мине ижади эшләүгә этәрә лә инде. Балалар менән бер ваҡытта ла күңелһеҙ булмай, көн дә бер яңылыҡ, ҡыҙыҡлы хәл булып тора, яңы донъя, яңы тормош асыла. 

    Мин үҙ өҫтөмдә ныҡлы эшләйем һәм оҫталығымды арттырам. Заман менән бергә атларға тырышып, инновацион технологиялар үҙләштерәм, традицион булмаған алымдар ҡулланам, әммә бер ваҡытта ла халҡыбыҙҙың изге, быуаттарҙан-быуаттарға күсә килгән халыҡ ижадынан тайпылмайым. Шуларҙың береһе- әкиәт. Эшемдә әкиәттәрҙе ҡулланыу ҙур тәрбиәүи әһәмиәткә эйә.

   Әкиәттәрҙе бөтәһе лә ярата: балалар ҙа, өлкәндәр ҙә. Өлкәндәрҙән айырмалы рәүештә, балалар әкиәтте яратып ҡына ҡалмай, уларҙы үҙҙәре йәшәгән донъя тип ҡабул итә. Әкиәт - балалар йөрәгенә асҡыс, ул универсаль уҡытыусы. Әкиәт ярҙамында бала тирә-яҡ донъяны аҡылы менән генә түгел, йөрәге менән дә ҡабул итергә өйрәнә.

   Әммә тәрбиәүи үҫешкә ирешеү өсөн баланы әкиәт менән таныштырыу оҫталығына ла эйә булырға кәрәк. Әкиәтте уҡыу, уның буйынса һорауҙар биреү, икенсеһен уҡый башлау ғына бик аҙ. Әкиәттең эстәлегенә айырым туҡталыу, уны уйнап күрһәтеү, төп мәлдәрен моделләштереү бик мөһим.Хәҙерге ваҡытта кескәйҙәрҙе әкиәттәр менән таныштырыу,халыҡ ижадына ҡыҙыҡһыныу уятыу өсөн заман талаптарына тап килгән технологиялар бик күп. Шундай технологияларҙың береһе булып Николай һәм Александр Веракса авторҙарының “Әкиәт уйнайыҡ” технология тора. Ошо технологияға таянып, мин кескәйҙәрҙе башҡорт халыҡ әкиәттәре менән таныштырам. Был технология,балаға әкиәтте тиҙерәк үҙләштерергә ярҙам итә. Моделдәр, геометрик фигуралар әкиәтте хәтерҙә ҡалдырырға ярҙам итә.